सोमवार, श्रावण १८ २०८३
सानोठिमी, भक्तपुर। शिक्षा तथा खेलकुद मन्त्रालय अन्तर्गतको पाठ्यक्रम विकास केन्द्रले आगामी शैक्षिक सत्र २०८४ देखि विद्यालय तहका विभिन्न कक्षामा परिमार्जित नयाँ पाठ्यक्रम र नयाँ पाठ्यपुस्तक लागू गर्ने भएको छ। केन्द्रले एक सूचना जारी गर्दै सम्बन्धित शिक्षा विकास तथा समन्वय एकाइ, सबै स्थानीय तह र सरोकारवालाहरूलाई तोकिएको समयमै यसको प्रभावकारी कार्यान्वयन गराउन आग्रह गरेको हो।
पाठ्यक्रम विकास तथा मूल्याङ्कन परिषद्को सिफारिस र मन्त्रालयको निर्णयानुसार स्वीकृत सामाजिक अध्ययन विषयको कक्षा ४-१२ को नयाँ पाठ्यक्रमका आधारमा तयार पारिएका कक्षा ५, ८, १०, र १२ का नयाँ पाठ्यपुस्तकहरू शैक्षिक सत्र २०८४ देखि पठनपाठनमा ल्याइने भएको हो।
त्यसैगरी, प्रारम्भिक बालविकास र आधारभूत तहको सिकाइलाई अझ व्यवहारिक र समयसापेक्ष बनाउने उद्देश्यले स्वीकृत 'आधारभूत तह कक्षा १–३ को परिमार्जित पाठ्यक्रम २०८२' तथा 'प्रारम्भिक बालविकास तथा शिक्षाको परिमार्जित पाठ्यक्रम २०८२' समेत शैक्षिक सत्र २०८४ बाटै लागू हुने केन्द्रले जनाएको छ।
पाठ्यक्रम अधिकृत कुमार घिमिरेका अनुसार, आगामी शैक्षिक सत्रदेखि नयाँ पाठ्यक्रम र पाठ्यपुस्तक बमोजिम अध्ययन-अध्यापनको व्यवस्था मिलाउन सबै स्थानीय तह र विद्यालयहरूलाई पूर्वतयारीका लागि यो जानकारी गराइएको हो।
.png)
